過去的台灣，工商業無像現此時即呢發達，一般人要討趁是無幾項仔頭路通尋，物資也真欠缺，囝仔人平常時無啥物通好食的，愛等到鬧熱擺才有紅龜、紅龜粿、草仔粿、糕仔chiai(這些)好料的通好術。

　　紅龜餡一般有豆沙餡、紅豆仔餡，嘛有人包綠豆餡。總-是空氣在人激，只要有人注文(訂購)，無論是要啥物餡，粿店就做的出來。有當時仔生理當好，就會發生人客定這款餡，去包著彼款餡，「紅龜包taN5餡」的代誌。若是拄著卡凊采的人客囉無要緊；阿若是當著卡注重個人口味的人客，就愛退貨重做。

　　佇銀行亦是佇任何公司食頭路，收現款時陣，上驚去拄著「紅龜包taN5餡」的齣頭，店1000箍-e內面若是夾1張仔500的亦是100的，無來發覺著，呣旦錢了人閣有代，掠帳會乎你掠甲天地倒反閣呣知人。

　　現此時台灣的勞動法令嘛是有真濟「紅龜包taN5餡」的現象，因為政商交結的關係，予真正代表勞工的代表，像咱聯合會前任理事長黃玉炎，佇社運界、工運界拍拚十幾年，頂一屆佇南投參選，雖罔是銀行員全力相挺，嘛是來落選。莫怪立法院咧討論勞動法令的時陣，全是資本家、金牛的聲音，甚至勞工立委簡錫土皆佇立法院內食拳頭母、被威脅，勞工干單有店邊a喝燒的份，致使原本應該包「勞工餡」的法律，煞來包著「資本家餡」。

　　今年台灣又閣要選舉a，向望台灣人這擺會當較gau5(摮)想，會當看較遠，為著國家、社會、未來，咱愛按hiai(那)「奧臭爛餡」攏甲車車去糞埽場，甲「專業餡」、「清氣餡」、「骨力餡」……包入去紅龜內，乎台灣會當勇勇健健，佇21世紀行出家己的大路。